Қазақстан ұнды қай елдерге көбірек экспорттайды?

Елде ұн өндірісі 1% артты

2023 жылғы қаңтар–қазанда ҚР-да дәнді дақылдардан және олардың майда тартылған қоспаларынан 2,7 млн тонна ұн өндірілді, бұл былтырғыдан 1% артық.

Шығарылған өнімнің басым бөлігі майда ұнтақталған бидай ұнына тиесілі: 2,5 млн тонна, жылдық өсім 1,5%.

Елде сондай-ақ нан өнімдеріне арналған 171,8 мың тонна қоспалар (бір жылда 2,1% азайған), 5,5 мың тонна ұсақ және ірі көкөніс ұны (40,1% азайған), бидайдан басқа дәнді дақылдардан 4,4 мың тонна (29% азайған) майда ұнтақталған ұн өндірілді.

Өңірлер бойынша Қостанай облысы дәстүрлі түрде ең көп ұн өндірді: 992,9 мың тонна, бір жылда 8,9% көбейген. Екінші және үшінші орында Солтүстік Қазақстан облысы (314,4 мың тонна, 11,7% көбейген) және Шымкент (268,4 мың тонна, 16,4% көбейген).

Қазақстандық ұн өндірушілер ішкі нарықты өте жақсы қамтамасыз етуде. Биыл қаңтар–қыркүйек қорытындысы бойынша, жергілікті компаниялар сұраныстың (ішкі нарықтағы сату және экспорт) 98,6%-ын қамтамасыз етті.

Ұн импорты 32,4 мың тоннаны құрады, бұл былтырғыдан 58,4% артық. Осындай айтарлықтай өсіммен елдегі импорттық өнімдердің үлесі әлі де аз: 1,4%.

Экспорт ресурстардың 60,5%-ын құрады, 2022 жылдың қаңтар–қыркүйегінде 58,4% болған. Жыл басынан бері 1,4 млн тонна ұн экспортталды, бұл былтырғымен салыстырғанда 6,6% артық.

Ішкі нарықтағы ұнды сату 2,1%, 890,6 мың тоннаға дейін төмендеді.

Биыл қаңтар–қазан қорытындысы бойынша, 464,7 млн АҚШ долларына ұн экспортталды, бұл былтырғымен салыстырғанда құндық мәнде 22,7% аз. Физикалық түрде экспорт 1,6 млн тоннаны құрады.

ТМД елдеріне 555,1 мың тонна ұн жөнелтілді, бұл 2022 жылғы қаңтар–қазанмен салыстырғанда 25,5% артық. Қазақстандық ұнды ең көп Өзбекстан сатып алды: 440,7 мың тонна — былтырғыдан 33,3% көп. Қазақстан ұнының негізгі сатып алушыларының үштігіне Тәжікстан мен Түрікменстан да кірді.

ТМД-дан тыс елдерге 296 млн АҚШ долларының 1 млн тонна ұны жөнелтілді. Мұнда негізгі сатып алушы Ауғанстан: 994 мың тонна — былтырғыдан 8% аз.